Formalisashon di okupashon ilegal ta nifiká ku ta hasi loke ta nesesario den kuadro di lei, regulashon i di maneho stipulá pa por kambia status di e okupashon di unu ilegal, pa unu legal. Di e moda aki esun ku ta okupá e tereno lo atkerí derecho pa por usa e tereno, e lo keda registrá ofisialmente i e lo bai kumpli debidamente ku rekerimentunan manera pago pa e uso di e tereno i pago di onroerendezaakbelasting (OZB).

Segun e Maneho Nobo, lo trata mas tantu posibel pa formalisá den forma aselerá kasonan di okupashon ilegal ku konstrukshon riba dje, si nan tabata eksistí promé ku e ‘nulmeting’. Si lei, regulashon òf maneho no ta permití esaki, lo no por formalisá e okupashon ilegal. Den kasonan asina, lo basha e konstrukshon abou.

Di bario pa bario

Lo atendé di bario pa bario ku formalisashon den forma aselerá. Den seshon di informashon ta brinda habitantenan ku ta okupá tereno di Gobièrnu den forma ilegal oportunidat pa mèldu nan mes boluntariamente i denter di un término stipulá hasi un petishon pa formalisashon.

No mèldu boluntariamente

Si un habitante ku ta okupá tereno di Gobièrnu den forma ilegal no mèldu su mes boluntariamente, lo tuma medida di òrdu kontra di dje. Ademas, lo tin gastu adishonal pa e habitantenan aki.

Kòntrakt di hür temporal

Den kaso ku formalisashon ta posibel, lo firma un kòntrakt di hür temporal. Mas despues, e persona lo drenta den e proseso pa haña su derechi di èrfpagt. Na momentu di firma e kòntrakt di hür temporal lo determina e kompensashon pa e hür temporal.

Si a mèldu boluntariamente i hasi petishon pa formalisashon, despues ku sera e kòntrakt di hür temporal lo no kobra kompensashon ku forsa retroaktivo. Den kaso ku no a mèldu boluntariamente, lo kobra kompensashon ku forsa retroaktivo, te na e momento ku e okupashon ilegal a kuminsá, te un máksimo di 5 aña.

formalisashon

button.pages.formalisashonspace